පසුගිය වසර පහක කාලය තුළ ස්වභාවික ආපදා සිදුවීම් 2180ක් වාර්තා වී තිබෙන බවත් ඉන් 318,000ක් පමණ මියගොස් තිබෙන බවත් පේරාදෙණිය විශ්වවිද්යාලයේ ආර්ථික හා සංඛ්යාන විද්යා දෙපාර්තමේන්තුවේ ජ්යෙෂ්ඨ මහාචාර්ය වසන්ත අතුකෝරාළ මහතා පවසයි. සාමාන්යයෙන් වසරකට ස්වාභාවික ආපදාවලින් ලොව 40000-50000ක පමණ පිරිසක් මියයන බවද හෙතෙම අවධාරණය කළේය.
පේරාදෙණිය විශ්වවිද්යාලයේදී ඊයේ (22) පැවැති මාධ්ය හමුවේදී අදහස් දක්වමින් මහාචාර්යවරයා මේ බව පැවසුවේය. වාර්ෂික ස්වාභාවික ආපදා වාර්තා වීම 400-500ක අගයක තිබෙන බවද ඒ මහතා කීය.
ගංවතුර, භූමිකම්පා, කුණාටු, ගිනිකඳු පිපිරීම්, ළැව්ගිනි. ග්ලැසියර් දියවීම, කඳු කඩාවැටීම, හිමපතනය, වියළි කාලගුණය වැනි ස්වාභාවික විපත් මෙහිදී සැලකිල්ලට ගෙන තිබෙන බවද මහාචාර්යවරයා ප්රකාශ කළේය.
මධ්යම කඳුකරයේ නාය යෑමට ලක්ව තිබෙන හා ඉදිරියේ නාය යෑමේ අවදානමක් ඇති ප්රදේශ සැලකීමේදී නිවාස අහිමිව සිටින පවුල් සඳහා තනි නිවාස ඉදිකර දීමට වඩා ප්රායෝගික වන්නේ නිවාස සංකීර්ණ ඇතිකර ඔවුන් පදිංචි කරවීම බව ද ඒ මහතා කීවේය. ලෝකයේ සිදුවන දේශගුණික විපර්යාසවල ස්වභාවය සැලකීමේදී ඉදිරියේදීත් මේ ආකාර ස්වාභාවික ව්යසනවලට රටක් ලෙස අපට මුහුණදීමට සිදුවනු ඇති බවත් ඒ වෙනුවෙන් දැරීමට සිදුවන ආර්ථික බර අවම කර ගැනීම සඳහා නිසි වැඩපිළිවෙළක් දියත් කළ යුතුව තිබෙන බවත් ඒ මහතා කීය. ස්වාභාවික ආපදා සිදුවීම නතර කළ නොහැකි නමුත් ඒවායින් වන බලපෑම අවම කර ගැනීමේ හැකියාව තිබෙන බවත් ලෝකයේ දියුණු රටවල් ඒ වෙනුවෙන් වැඩි අවධානයක් යොමුකර තිබෙන බවත් වසන්ත අතුකෝරාළ මහතා පැවසුවේය