වහාම ක්රියාත්මක වන පරිදි ජනපතිගේ මැදිහත්වීමෙන් ජාතික ඒකාග්රතා කමිටුවක් ස්ථාපිත කළයුතු බව විපක්ෂ නායක සජිත් ප්රේමදාස මහතා පාර්ලිමේන්තුවේදී ඊයේ (18) ප්රකාශ කළේය.
විසර්ජන පනත් කෙටුම්පත (2026) අය – වැය කාරක සභා අවස්ථාවේ විවාදයට එක්වෙමින් ඒ මහතා මේ බව සඳහන් කළේය. ආරක්ෂක අමාත්යාංශයේ සහ මහජන ආරක්ෂක හා පාර්ලිමේන්තු කටයුතු අමාත්යාංශයේ වැය ශීර්ෂ සම්බන්ධයෙන් මේ විවාදය පැවැත්විණි.
එහිදී වැඩිදුරටත් සජිත් ප්රේමදාස මහතා මෙසේද පැවසීය.
ත්රිකුණාමලය විහාරස්ථානයක සිදුවූ සිද්ධිය ජාතික ආරක්ෂාවට හිතකර දෙයක්ද අහිතකර දෙයක්ද. මේ සඳහා පූජා භූමි ඔප්පු ලැබී තිබෙනවා. නමුත් බුදු පිළිමය ඉවත් කරන්න තිබෙන අයිතිය කුමක්ද. පස්සේ ආපසු ගෙනවිත් බුදු පිළිමය තැන්පත් කර තිබෙනවා. බුද්ධ ශාසනයට ලැබෙන ප්රමුඛත්වය අපි දන්නවා. මේ තත්ත්වය තුළදී වහාම ක්රියාත්මක වන පරිදි ජාතික ඒකාග්රතා කමිටුවක් ස්ථාපිත වියයුතු වෙනවා. ඒක රටේ ජනාධිපතිවරයා ක්රියාත්මක කළ යුතුයි. මෙවැනි ප්රශ්න පැමිණි පසුව පොලීසිවලට භාර දී වැඩක් නැහැ. මේවා ලෙහෙසි ප්රශ්න නොවෙයි. සෙසු ආගම්වල ගැටලු එනවිට අපි ඒ ගැනත් කටයුතු කර තිබෙනවා. අද බෞද්ධාගම විකෘති කරන පිරිසක් ඉන්නවා. මේ නිසා ජාතික ඒකාග්රතා කමිටුවක් පත්කළ යුතු වෙනවා. අපි ගිනි තියන්න හොඳ නැහැ. ගින්න නිවා දැමිය යුතු වෙනවා. ආරක්ෂක අංශ මෙවැනි ප්රශ්න සඳහා ඇඟිලි ගැසීමට පෙර ප්රශ්නයෙන් පැන යන්නේ නැතිව කටයුතු කළයුතු වෙනවා.