බුද්ධි තොරතුරු සහ චන්ද්රිකා ඡායාරූප තිබියදී අහිංසක දියණියන් 165 දෙනෙකු ඝාතනය කළඅපි ත් රස්තවාදීන් – ඇමරිකානු හිටපු බුද්ධි නිලධාරිනියකගෙන් චෝදනාවක්
ඉරානයේ මිනාබ් (Minab) නුවර පිහිටි දැරියන්ගේ පාසලකට එල්ල වූ මාරාන්තික මිසයිල ප්රහාරය සම්බන්ධයෙන් හිටපු ඇමරිකානු බුද්ධි අංශ නිලධාරිනියක වන ජොසෆින් ගිල්බෝ (Josephine Guilbeau) දැඩි විවේචනයක් එල්ල කර තිබේ. ඇය පෙන්වා දෙන්නේ පිරිපුන් බුද්ධි තොරතුරු සහ චන්ද්රිකා ඡායාරූප පවතිද්දී පවා, ඇමරිකානු මිසයිල මගින් අහිංසක දැරියන් 165 දෙනෙකු ඝාතනය කිරීම බරපතල අපරාධයක් බවයි. මෙම සිදුවීම සම්බන්ධයෙන් කිසිදු වගවීමක් නොමැති වීම පිළිබඳව සිය කලකිරීම පළ කරන ඇය, “සැබෑ ත්රස්තවාදීන් අපියි” (WE ARE THE TERRORISTS) යනුවෙන් පවසමින් ඇමරිකානු විදේශ ප්රතිපත්තිය දැඩි දෝෂදර්ශනයට ලක් කර ඇත.
පසුගිය පෙබරවාරි 28 වන දින ‘ෂජාරා තයියෙබා’ (Shajareh Tayyebeh) පාසලට එල්ල වූ මෙම ප්රහාරය සම්බන්ධයෙන් සිදුකළ ස්වාධීන පරීක්ෂණවලදී හෙළි වී ඇත්තේ, ඇමරිකානු ආරක්ෂක අංශ සතුව තිබූ යාවත්කාලීන නොවූ (Outdated) දත්ත පදනම් කරගනිමින් මෙම සිවිල් පාසල හමුදා මධ්යස්ථානයක් ලෙස වැරදියට හඳුනාගෙන ඇති බවයි. කෙසේ වෙතත්, ඇමරිකානු ජනාධිපති ඩොනල්ඩ් ට්රම්ප් මෙම චෝදනා ප්රතික්ෂේප කරමින් කියා සිටියේ මෙය ඉරානය විසින්ම සිදු කරන ලද්දක් විය හැකි බවයි. ජොසෆින් ගිල්බෝ වැනි හිටපු නිලධාරීන් මෙලෙස හඬ නැගීමත් සමඟ මෙම සිදුවීම ජාත්යන්තර යුද අපරාධයක් ලෙස විමර්ශනය කළ යුතු බවට මානව හිමිකම් සංවිධාන බලකර සිටී.
මෙම ප්රහාරය එල්ල වන අවස්ථාවේදී පාසල තුළ ළමුන් සහ ගුරුවරුන් සිය ගණනක් සිටි බවත්, එල්ල වූ මිසයිල ප්රහාර තුනකින් පාසල් ගොඩනැගිල්ල මුළුමනින්ම පාහේ විනාශ වූ බවත් වාර්තා වේ. චන්ද්රිකා ඡායාරූප මගින් මෙම ස්ථානය 2016 වසරේ සිටම සිවිල් පාසලක් ලෙස වෙන් කර තිබූ බව පැහැදිලිව පෙනෙන්නට තිබියදීත් මෙවැනි ප්රහාරයක් එල්ල වීම බරපතල නොසලකා හැරීමක් ලෙස සැලකේ. මෙම ප්රකාශයත් සමඟ ඇමරිකාව තුළ මෙන්ම ජාත්යන්තර වශයෙන් ද යුද්ධයට එරෙහි විරෝධතා යළිත් උත්සන්න වී තිබේ.