ප්රංශය, එංගලන්තය ඇතුළු යුරෝපා රටවලට පැනගිය මෙරට ප්රධාන පෙළේ පාතාලකරුවන් දස දෙනකු දේශපාලන රැකවරණ ලබා ගැනීම හේතුවෙන් ඒ රටවල නීතිය අනුව මෙරටට ගෙන්වා ගැනීමට අසීරු තත්ත්වයක් මතුව ඇතැයි වාර්තා වේ.
කංජිපානි ඉම්රාන්, කුඩු අංජු, රොටුඹ අමිල සහ රූබන් ආදීහු මෙසේ යුරෝපයට පැනගොස් සිටින පාතාලකරුවෝ වෙති. රත්මලානේ කුඩු අංජු ප්රංශයේ දී අත්අඩංගුවට ගත්ත ද මෙරටට භාර නොදුන් අතර ඔහු මේ වනවිට එරට දේශපාලන රැකවරණ ලබා සිටී.
ප්රබල පාතාල අපරාධකරුවන් බොහෝ දෙනකු එංගලන්තය, ප්රංශය, රුසියාව, ඉතාලිය, ඔස්ට්රියාව ආදී යුරෝපීය රටවලට සංක්රමණය වී ඇති බවත් රත්ගම විදුර, කොස්ගොඩ සුජී, ලාල්, අන්නාසි මොරිල්, මොහොමඩ් සිද්ධික් වැනි මත්කුඩු ජාවාරමේ නිරත ප්රබල පාතාල අපරාධකරුවන් රැසක් ද දැනට සිටින්නේ යුරෝපීය රටවල බවත් පොලිස් ආරංචි මාර්ග පවසයි.
මේ සම්බන්ධයෙන් මහාචාර්ය නීතිඥ ප්රතිභා මහානාම හේවාගෙන් කළ විමසුමකදී ඔහු පැවසුවේ යුරෝපීය රටවල සිටින පාතාලකරුවන් පිරිසක් දේශපාලන රැකවරණ ලබා ගැනීම හේතුවෙන් මෙරටට ගෙන්වා ගැනීමේ විශාල අභියෝගයක් මතුව ඇති බවයි. මේ අනුව යුරෝපයට පැන ගොස් සිටින පාතාලයන් සම්බන්ධයෙන් රජයට වෙනත් ක්රියාමාර්ගයක් ගැනීමට සිදුවනු ඇතැයි විචාරකයෝ සඳහන් කරති.
පාතාල නායකයකු වූ ගනේමුල්ල සංජීව ඝාතනය සම්බන්ධයෙන් නේපාලයේදී අත්අඩංගුවට ගනු ලැබූ ඉෂාරා සෙව්වන්දි නමැත්තිය ද එසේ අත්අඩංගුවට ගැනීමට පෙර යුරෝපයේ රටකට පැනයාමේ උත්සාහයක් තිබී ඇතැයි අනාවරණය වී ඇත. ඇය එසේ යුරෝපයට පැන ගියා නම් දේශපාලන රැකවරණ හේතුවෙන් අත්අඩංගුවට ගැනීමේ ගැටලුවක් අනිවාර්යයෙන්ම මතුවීමට ඉඩ තිබූ බව ආරංචි මාර්ග සඳහන් කරයි. බොහෝ යුරෝපා රටවල රටකින් රටකට සැකකරුවන් භාරදීමේ ක්රියාවලිය නැතහොත් උදර්පණය බලාත්මක නොවන බව එම ආරංචි මාර්ග වැඩිදුරටත් අනාවරණය කළේය.