ශ්රී ලංකාවේ හා ඉන්දියාවේ සත්කාරකත්වයෙන් ලබන වසරේ පැවැත්වීමට නියමිත විස්සයි20 ලෝක කුසලාන ක්රිකට් තරගාවලියට පෙර ශ්රී ලංකා පිලට විස්සයි20 තරග 6ක් හා එක්දින තරග 3ක් ලබාදීමට ශ්රී ලංකා ක්රිකට් ආයතනය කටයුතු යොදා ඇත. මේ ජාත්යන්තර ක්රිකට් තරග 9 ශ්රී ලංකාවේදී පැවැත්වීමට කටයුතු යොදා තිබීම විශේෂත්වයකි.
දඹුල්ල, කොළඹ හා මහනුවර ක්රීඩාංගණවලදී එකපෙළට පැවැත්වෙන මේ ජාත්යන්තර ක්රිකට් තරග ලෝක කුසලාන ක්රිකට් තරගාවලියට සහභාගිවන ශ්රී ලංකා ක්රිකට් පිලට හොඳ පෙරහුරු තරග කිහිපයක් ලෙස සැලකේ.
මුලින්ම පාකිස්තාන ක්රිකට් කණ්ඩායම ලබන ජනවාරි මස ශ්රී ලංකාවේදී විස්සයි20 තරග 3කට එක් වීමට නියමිත අතර, අනතුරුව ජනවාරි මාසයේදීම එංගලන්ත පිල සමඟ එක්දින හා විස්සයි20 තරගාවලිය පැවැත්වේ.
පාකිස්තාන පිල වසර 10කට පසු ශ්රී ලංකාවට පැමිණෙන අතර, අවසන් වරට 2015 වසරේදී පැමිණි පාකිස්තාන පිල විස්සයි20 තරග 2කදී ජය අත්කර ගත්තේය. එම වසරේම පාකිස්තානය හා ශ්රී ලංකාව අතර පැවති එක්දින තරගාවලිය පාකිස්තානය 3-2ක් ලෙස ජය ගත්තේය.
එංගලන්ත පිල වසර 7කට පසු ශ්රී ලංකාවේදී විස්සයි20 හා එක්දින තරගාවලියකට එක්වන අතර, අවසන් වරට 2018දී පැවති විස්සයි20 තරගයෙන් එංගලන්තය ජයගත් අතර, එක්දින තරගාවලිය 3-1ක් ලෙස එංගලන්තයට ජය හිමි විය.
පාකිස්තාන පිල දඹුල්ල ජාත්යන්තර ක්රිකට් ක්රීඩාංගණයේදී ජනවාරි 7, 9 සහ 11 දිනවල විස්සයි20 තරග තුනකට ක්රීඩා කරන අතර, එංගලන්ත පිල කොළඹ ආර්. ප්රේමදාස පිටියේදී ජනවාරි 22, 24 හා 27 දිනවලදී එක්දින තරගාවලියට හා පල්ලෙකැලේ ජාත්යන්තර ක්රීඩා පිටියේදී ජනවාරි 30, පෙබරවාරි 1 හා 3 යන දිනවලදී විස්සයි20 තරග තුනට එක්වනු ඇත.