දැනට සිරගත වී සිටින අක්ෂි ආබාධයකින් පීඩා විඳින ඉම්රාන් ඛාන්ට වහාම ප්රතිකාර ලබාදීමට මැදිහත් වන ලෙස ජාත්යන්තර ක්රිකට් පිටියේ හිටපු නායකයන් 14 දෙනෙක් පාකිස්තානයේ අගමැති ශෙබාස් ෂරීෆ්ට පෙත්සමක් ඉදිරිපත් කර ඇතැයි විදෙස් මාධ්ය වාර්තා කරයි. 1992 එක්දින ක්රිකට් ලෝක කුසලානය පාකිස්තානයට අත්කර දීමට නායකත්වය ගත් ඉම්රාන් ඛාන්ට මූලික මානව හිමිකම් යටතේ නිසි ගෞරවය සහ සැලකිල්ල ලබා දෙන ලෙස එම පෙත්සම මඟින් හිටපු ක්රිකට් නායකයන් පාකිස්තානය අගමැතිවරයාගෙන් ඉල්ලා ඇතැයි ද වාර්තා වේ. පාකිස්තානයට ඓතිහාසික ලෝක කුසලාන ජයග්රහණයක් හිමිකර දුන් අසහාය ක්රිකට් නායකයා ඉම්රාන් ඛාන් බවත්, තුන්ඉරියව් දස්කම් සහ ක්රීඩාශීලීත්වය මත ගොඩ නැඟුණු ඉම්රාන්ගේ නායකත්වය ලෝක ක්රිකට් ප්රජාව අතර ඔහුට විශාල ගරුත්වයක් ලබා ගැනීමට ඉවහල් වූ බවත් එම පෙත්සමේ සඳහන් කර ඇතැයි වාර්තා වේ.
‘ඔහුගේ ක්රිකට් නායකත්වය සියලු රටවල පරම්පරා ගණනාවකට දේශසීමාවකින් තොරව ආස්වාදයක් ගෙන දුන්නා. අප බොහෝ දෙනෙක් ඔහුට එරෙහිව තරග කළා. ඔහු සමඟ එකම ක්රීඩාංගණය බෙදා ගත්තා. එහෙත් ඔහුගේ ප්රතිරූපය ඉහළින්ම කැපී පෙනුණා. ඔහු මෙතෙක් අප දැක ඇති හොඳම තුන්ඉරියව් ක්රීඩකයකු ලෙස ඉතිහාසයට එක්වී සිටිනවා. ඔහු ක්රීඩාලෝලීන්ගේ හා පරිපාලනයෙත් ගෞරවය දිනාගත්තා. ඒ ගරුත්වය තවදුරටත් ඉම්රාන්ට ලැබෙන බවට සහතික වන ලෙස අප පාකිස්තාන රජයෙන් ඉල්ලා සිටිනවා. මේ වන විට වාර්තාවන ඔහුගේ සෞඛ්ය ගැටලු විසඳීමට අවශ්ය පියවර ගන්නැයි අප කාරුණිකව ඉල්ලා සිටිනවා. අඛණ්ඩ වෛද්ය ප්රතිකාර, පවුලේ සාමාජිකයන්ට ඔහු දැකබලා ගැනීමට අවස්ථාව ඇතුළුව ජාත්යන්තර ප්රමිතියට අනුකූලව මානුෂීය සහ ගෞරවනීය ලෙස ඔහුට සලකන ලෙසත්, යුක්තිය පිළිබඳ මූලධර්ම ආරක්ෂා කිරීමට සහ ගරු කිරීමට අප පාකිස්තාන බලධාරීන්ගෙන් තරයේම ඉල්ලා සිටිනවා.‘ එම පෙත්සමේ එසේ සටහන් කර ඇතැයි විදෙස් මාධ්ය වාර්තා කරයි.
ඉන්දියාවේ සුනිල් ගවස්කර්, කපිල් දේව්, ඔස්ට්රේලියාවේ ග්රෙග් චැපල්, ඉයන් චැපල්, කිම් හියුස්, ඇලන් බෝඩර්, ස්ටීව් වෝ, බෙලින්ඩා ක්ලාක්, එංගලන්තයේ මයික් බෙයාර්ලි, මයිකල් ඇතර්ටන්, නසාර් හුසේන්, ඩේවිඩ් ගවර්, බටහිර ඉන්දීය කොදෙව් පිලේ ක්ලයිව් ලොයිඩ් සහ නවසීලන්තයේ ජෝන් රයිට් එම පෙත්සමට අත්සන් තබා ඇතැයි වාර්තා වේ.
කිසිදු පාකිස්තාන ක්රිකට් ක්රීඩකයකු ඊට අත්සන් තබා නොමැති අතර, ඉම්රාන්ට නිසි ප්රතිකාර ලබා දෙන ලෙස පසුගිය සතියේදී වසීම් අක්රාම්, වකාර් යූනිස් සහ ශහීඩ් අෆ්රිඩි ඇතුළු හිටපු ක්රීඩකයන් කිහිපදෙනකු සමාජ මාධ්ය ඔස්සේ පාකිස්තාන රජයෙන් ඉල්ලීමක් කළ බව වාර්තා වේ.